काठमाडौँ । प्रधानमन्त्री सुशीला कार्कीले आगामी निर्वाचनको सन्दर्भमा सुरक्षा तथा शान्ति व्यवस्थापनका विषयमा चिन्ता व्यक्त गरेकी छन् ।
उनले एक हप्ताभित्र फागु पूर्णिमा (होली) पर्व आउँदै गरेको र हिमाली क्षेत्र खासगरी रुकुम पूर्वमा सम्भावित हिमपात जस्ता प्राकृतिक समस्याहरू देखा पर्न सक्ने भन्दै चिन्ता व्यक्त गरेकी हुन् ।
उनले विभिन्न जिल्लाहरूमा स्थानीय समस्या रहेको उल्लेख गर्दै तराई क्षेत्रमा केही राजनीतिक दलहरू बढी सक्रिय रहेको र तिनीहरूबीचको प्रतिस्पर्धा झडपको रूपमा बदलिन सक्ने आशंका व्यक्त गरिन् । पार्टीहरूबीच झण्डा जलाउने जस्ता घटना पनि रिपोर्ट भएका र जसले निर्वाचनको समयमा तनाव बढाउन सक्ने बताइन् । यस्ता सम्भावित घटनाबाट बच्न पूर्वतयारी आवश्यक रहेको प्रधानमन्त्री कार्कीको भनाइ छ ।
निर्वाचन बहिष्कार गर्ने समूहहरूबारे बोल्दै उनले यस्ता बहिष्कारकर्ताहरूको प्रभावकारिता कमजोर देखिएको बताइन् । उनकाअनुसार कतिपयले निर्वाचन बहिष्कारको नाममा पार्टीको अस्तित्व देखाउने र एक्सटर्सन (चन्दा/पैसा असुली) गर्ने प्रवृत्ति अपनाएका छन् । कसैले व्यापार वा उद्योग गरेको देखाएर पार्टी चलाउने गरेको पनि उल्लेख गरिन् । यद्यपि, यस्ता गतिविधिप्रति तर्क रहनुपर्नेमा जोड दिइन् ।
उनले भनिन् ‘फागु पूर्णिमाको दिन समस्या, त्यो पनि एउटा पर्वको समस्या । अनि हिमाली क्षेत्रमा रुकुम पूर्वमा सम्भावित हिमपात यति एउटा महत्त्वपूर्ण समस्याहरू हुन् । यहाँको भनेर अघि प्रत्यनापतिज्यूले उल्लेख गर्नुभएको छ । त्यसपछि यहाँहरूका पनि आफ्नो ठाउँ ठाउँको जिल्ला जिल्लाको समस्याहरू पनि यहाँ देखियो । यो झडपमा पहाडतिर त देखिएन यो तराई तराई तिर अब हुन्छ नि, दुई तीन वटा पार्टीहरू अलि बढी सक्रिय र उनीहरू प्रभावकारी छन् । त्यो पार्टी बीचमा कसले जित्ने कसले हार्ने त्यो बीचमा केही केही खेल गर्न खोज्नु र त्यसै झडपको रूपमा परिणत हुनु त्यो त हामीले अब एउटा आशंका गर्ने ठाउँ भयो । नहुन पनि सक्छ हुन पनि सक्छ तर यो कुरालाई तयारी त हुनुपर्यो नि । अब हिजो अस्ति एउटाको पार्टीको अर्कोले झण्डा जलायो भन्ने यस्ता कुरा पनि आएको छ ।
यस्तो किसिमको आउन सक्छ । तयारी हुनुपर्ने हो। अब निर्वाचन बहिष्कार गर्ने यो निर्वाचन बहिष्कार गर्नेहरूको मलाई कस्तो लाग्यो भने मैले यसरी भन्न मिल्छ की मिल्दैन, मैले अध्ययन गरेअनुसार यसो अहिलेसम्म हेरेअनुसार यो के रहेछ भने देखिन प्रभावकारी छैनन् पार्टीको त्यति एउटा दुई चार पाँच जनाको एउटा समूह छ, त्यो चुनाव लड्न पनि सक्दैन र जनतासँग भिजेको पनि छैन अनि धेरै ठाउँमा सबैलाई त दोष लाउन मिल्दैन कसै कसैले यसो एक्स्टर्सनबाट पैसा पनि उठाउने पार्टीको अस्तित्व पनि देखाउने निर्वाचनमा निर्वाचन लड्दिन भन्दिए पछि पुगी गयो केही गर्न परेन कुनै फंक्सन पनि गरेन एउटा पार्टी जीवित पनि रही रहन्छ पैसा उठी पनि रहन्छ र यो खालको प्रवृत्ति देखियो । कसैले मैले अनि त्यस्तो पैसा, कसैले मैले यो व्यापार गरेको छु ,यो उद्योग गरेको छु पार्टीबाट भन्यो त्यसैलाई देखाइदियो, त्यो खालको देखिएको छ । तर पनि यसमा सतर्क त हुनुपर्छ ।’
प्रधानमन्त्री कार्कीले निर्वाचनलाई शान्तिपूर्ण र निष्पक्ष बनाउन सुरक्षा निकायलाई उच्च सतर्कता अपनाउन निर्देशन दिइन् ।
Leave a Reply